«Еңбек» бағдарламасы арқылы былтыр Павлодар облысына 3200-ден астам адам көшіп барды

2017 жылдан 2021 жылға дейін «Еңбек» мемлекеттік бағдарламасы шеңберінде аймаққа 11 мыңнан астам адам қоныстанды, деп хабарлайды Pavlodarnews.kz.

Бұл жайлы өңірлік коммуникациялар қызметінде өткен баспасөз конференциясында облыстық жұмыспен қамтуды үйлестіру және әлеуметтік бағдарламалар басқарманың басшысы Альмира Дисюпова мәлім етті.

Альмира Дисюпова биыл «Еңбек» бағдарламасы аясында облысымызға 3600 квота бөлінгенін атап өтті. Оның ішінде ішкі көші-қон бойынша 2800 адамға, сыртқы көші-қон бойынша 800 адамға беріледі.

«Алайда бүгінгі күнде орындау нәтижесі аса мәз емес деп айтуға болады, өйткені белсенділік танытқан адамдар аз. Бағадарламаның негізгі мақсаты – еңбекке қабілетті мамандарды көшіріп әкелу. Ішкі көші-қон бойынша 536 адам Павлодар және Екібастұз қалаларына, Ақтоғай, Павлодар, Успен аудандарына қоныс аударады. Олардың орта арнаулы немесе жоғары білімі болуы қажет», - деді Альмира Дисюпова.

Ол өз сөзінде 536 адамның 369-ы тұрақты жұмыс орнына қабылданғанын айтып өтті. Олар көбінесе білім беру, ауыл шаруашылығы, денсаулық сақтау салаларына жұмысқа орналасады. Қоныс аударушылардың ең көп саны 47%-ы ауылдық жерлерде, 17%-ы аудан орталықтарында және 36%-ы облыс қалаларына тиесілі.