Нұр-Сұлтанда жазасын қоныс колониясында өтеп жатқан жүргізушіден тапанша табылды

Нұр-Сұлтанда  ішімдік ішкені үшін 6 айға сотталған және жазасын қоныс колониясында өтеп жатқан жүргізушіден тапанша табылды, деп хабарлайды Azattyq Ruhy.

«Елордалық полиция қызметкерлері «Қылмысқа тосқауыл» жедел-алдын алу іс-шарасы барысында «Lexus RX 350» маркалы автокөлігiн тоқтатты. Құжаттарды тексеру кезінде 28 жастағы жүргізуші ағымдағы жылдың сәуір айында ҚР ҚК 346-бабы 1-бөлігі бойынша көлiк басқару құқығынан айырылғанына қарамай көлік құралын мас күйінде жүргізгені үшін 6 ай мерзімге сотталып, жазасын қоныс-колониясында өтеп жатқандығы анықталды. Көлікті одан әрі тексеру барысында салонда «Оса» маркалы тапанша табылды», -- деп көрсетті Нұр-Сұлтан қаласы Полиция департаментінен.  

Полицейлер тапаншаны тәркіледі. Сот-баллистикалық сараптама нәтижелері бойынша қару атуға жарамды екендiгi анықталды.

Аталған факті бойынша ҚР ҚК 287-бабы 2-бөлігі (қаруды, оқ-дәрілерді, жарылғыш заттар мен жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру) бойынша сотқа дейінгі тергеп-тексеру амалдары жүргізілуде.