ШҚО-да табиғи газ Қытайға экспортталып жатқан жоқ – ШҚО әкімі

Зайсан ауданында 3795,4 млн текше метр көлемінде табиғи газ қоры бар. Бірақ «Сарыбұлақ» кен орнынан газ экспорттауға байланысты күрделі жағдай қалыптасып отыр, деп хабарлайды Azattyq Ruhy тілшісі.

Кен орнын игеру басталғалы бері ҚХР-ға 3 354,1 млн текше метр (88,3%) экспортқа және 84,4 млн текше метр (2,2%) халыққа жіберілді. Бұл туралы ШҚО әкімі Даниал Ахметов ОКҚ-да өткен брифингте айтты.

Өңір басшысының айтуынша, жыл басында кен орны бойынша алынатын газдың қалдық қоры 328,5 млн текше метрді құраған. Бұл Зайсан ауданының халқын 11 жыл ішінде газбен қамтамасыз етуге мүмкіндік береді.

«Газ қорларының сарқылуына байланысты ҚР Энергетика министрлігі 2021 жылғы 20 желтоқсаннан бастап ҚХР-ға газ экспортын тоқтату туралы, содан кейін «Тарбағатай Мұнай» ЖШС-нің өтініші бойынша биылғы жыл ішінде 75 млн текше метрден аспайтын лимитпен 2022 жылғы 28 ақпандағы газ экспортын қайта бастау туралы шешім қабылдады. Министрлік қабылдаған шешім халықтың наразылығын және теріс көзқарасты тудырады. Азаматтардың мүдделерін қорғау бойынша мемлекеттік саясатты жүргізуді қамтамасыз ете отырып, ҚХР-ға экспортты тоқтата тұру және ымыралы шешім қабылдау қажеттілігіне қатысты ҚР Премьер-министрінің және ҚР Премьер-министрі бірінші орынбасарының атына хаттар жіберілді», - деді Даниал Ахметов.

Облыс әкімдігінің бастамасымен осы жылдың 5 мамырында ҚР Премьер-министрінің бірінші орынбасары Р.В. Склярдың төрағалығымен осы мәселе бойынша кеңес өткізілген. Сонымен қатар, 11 мамырда ҚР ЭМ вице-министрі А.Г. Хасеновтың қатысуымен Зайсан ауданының тұрғындарымен кездесу өткізілді. Онда өңір тұрғындарының талабы бойынша ҚХР-ға газ экспортын уақытша тоқтата тұру және барлық мүдделі тараптарды тарта отырып комиссия құру туралы шешім қабылданды.

Ал 14 маусымында Энергетика министрі Болат Ақшолақовтың, Энергетика вице–министрі Асхат Хасеновтың және «Тарбағатай Мұнай» ЖШС акционері Б. Қалиевтің қатысуымен кеңес өткізілді. Кеңес қорытындысы бойынша газдың қалдық қорларын анықтау бойынша геологиялық барлау жұмыстары аяқталғанға дейін «Тарбағатай Мұнай» ЖШС экспортын тоқтата тұру туралы шешім қабылданды.