Қазақстанда трансшекаралық сауда рәсімдерін жеңілдететін портал іске қосылды

Қазақстанда бизнес үшін сауда рәсімдерін жеңілдететін tradeinfo.kz ақпарат порталы жұмысын бастады, деп хабарлайды Azattyq Ruhy Сауда және интеграция министрлігіне сілтеме жасап.

Ready4Trade-Орталық Азия жобасы Қазақстанның сауда порталын іске қосты. Оны Еуропалық Одақ қаржыландырып, Халықаралық сауда орталығы іске асырады. Портал барлық импорттық, экспорттық және транзиттік шарттылықты, қажетті құжаттарды, нысандар мен рәсімдерді егжей-тегжейлі сипаттайды. Қазір порталда 50-ден астам тауарға арналған рәсімдер сипатталған.

Қазақстанда платформаны Сауда және интеграция министрлігімен ынтымақтастықта «QazTrade» сауда саясатын дамыту орталығы» АҚ әзірледі.

ҚР Премьер-Министрінің орынбасары – қаржы министрі Ерұлан Жамаубаев сауда порталы Қазақстанда ғана емес, бүкіл Орталық Азия өңірінде тұрақты және жан-жақты экономикалық дамуға ықпал ететініне сенім білдірді.

«Енді Қазақстанның сыртқы экономикалық қызметіне қатысушылар импортта, экспортта және транзитте қолданылатын қағидалар мен рәсімдерге қол жеткізе алады. Біз үшін Сауда порталы отандық бизнестен кері байланыс алу құралына айналады. Осы бағыттағы жұмыс бизнес қауымдастықтармен және уәкілетті органдармен белсенді түрде пысықталатын болады», — деді вице-премьер.

Өз кезегінде ЕО-ның Қазақстан Республикасындағы Елшісі Кестутис Янкаускас мырза порталды әзірлеуге қатысқан барлық тараптарға, әсіресе Сауда және интеграция министрлігі мен QazTrade компаниясына алғысын білдірді. Ол, сондай-ақ, сауда порталы мен сауда рәсімдерін жеңілдету жөніндегі бастамалардың бүгінгі жаһандық сын-қатерлерге нақты жауап екенін атап өтті. Қорытындылай келе, Елші ЕО-ның Қазақстанмен және оның барлық қатысушыларымен бірге тұрақты экономикалық дамуға жәрдемдесу және даму саласындағы барлық басқа мақсаттарға қол жеткізу ісіне бейілділігі туралы мәлімдеді.

«2020 жылдың тамыз айынан бастап QazTrade – Ready4Trade-Орталық Азия жобасының институционалдық серіктесі. Теңіз көлігімен тасымалдауды ұлғайтуға қызығушылықты арттырудың және Каспий теңізіндегі порттардың әлеуетін кеңейтудің өзектілігін ескере отырып, алғаш рет теңіз порттарының импорттық және экспорттық операцияларының бизнес-процестерін кезең-кезеңімен құжаттау жүргізілді. Мен сауда порталы барлық сауда рәсімдері бойынша гид болатынына сенімдімін», — деп түйіндеді QazTrade бас директоры Азамат Асқарұлы.

Қазақстанның сауда порталы – Халықаралық сауда орталығы іске асыратын және Еуропалық Одақ қаржыландыратын «Ready4Trade Central Asia» жобасының құрамдас бөліктерінің бірі. Осыған ұқсас порталдар әлемнің 30 елінде іске асырылған. Орталық Азияда ұқсас порталдар Тәжікстан мен Қырғызстанда бар. Сауда порталдарын іске қосуды Өзбекстан мен Түрікменстан жоспарлап отыр.