Экономиканы әртараптандыру жағдайы нашар – Сенат спикері

Бүгінгі Сенат отырысында палата төрағасы Мәулен Әшімбаев Қазақстанда жұмыс істейтін ірі шетелдік компанияларға өндірісті дамыту үшін сыртқы қарыздарға жүгінуге тура келетінін атап өтті.

«Бұл экономиканы әртараптандыру бойынша өте өкінішті жағдайды көрсетеді. Экономиканы әртараптандыру үшін несиелеу немесе қорландырудың баламалы көздері қажет», - деді Мәулен Әшімбаев.

Оның айтуынша, Қазақстанда несиелеу бірқатар себептерге байланысты қысқарған.

«Әзірге балама көздер жоқ. Бағалы қағаздардың дамыған нарығы да жоқ. Лизингтік тетіктер де тиімді жұмыс істемейді, бюджеттік шектеулерге байланысты тікелей мемлекеттік қаржыландыру төмен деңгейде. Тиісінше, бізде әртараптандыру үшін қаржылық база жоқ», - деп атап өтті Сенат Төрағасы.

Кәсіпкерлерге несие алу өте қиын, сонымен бірге тұтынушылық несие де өсіп келеді.

«Банк секторында өткен жылы жеке тұлғаларға кредит берудің шамамен 40% - ға артқанын көріп отырмыз. Банктер Ұлттық банк пен Қаржы нарығын реттеу агенттігі белгілеген өте қатаң нормативтерге байланысты экономиканың нақты секторын қаржыландырғылары келмейді. Олар қарапайым тұтынушыларға несие беруді көздейді.   Ал егер бізде несиелік негіз болмаса, экономиканы әртараптандырып, экономикалық өсуді қалай қамтамасыз етеміз?»,- деді Сенат Төрағасы.

Мәулен Әшімбаев сенаторлар экономиканы әртараптандыру мәселесін Үкімет алдына бірінші рет қойып отырған жоқ, сондықтан Қазақстанның бүкіл қаржы жүйесін бұзбай, банктерге экономиканың нақты секторын еркін несиелендіру үшін алдағы кезеңде кепіл талаптарын жеңілдету жолымен жүруі мүмкін екенін атап өтті.