Ақтөбеде екі ауылдың су құбырын жөндеуге бөлінген қаржыны жымқырған шенділер сотталды

Azattyq Rýhy

Сотталушылар ұрланған қаражатты мемлекетке қайтарған

Ақтөбеде екі ауылдың су құбырын жөндеуге бөлінген қаржыны жымқырған шенділер сотталды
Фото ашық дереккөзден

Ақтөбенің Темір ауданында шенеуніктер Кеңкияқ пен Шұбарқұдық ауылдарындағы су құбырын жөндеуге бөлінген қаражатты жымқырған, деп хабарлайды Azattyq Rýhy Ақтөбе облыстық сотының баспасөз қызметіне сілтеме жасап.

Бюджеттің 14 миллион теңгесін жеп қойды деп айыпталған аудандық тұрғын үй коммуналдық шаруашылық бөлімінің басшысы болған Жәнібек Айдашев пен оның екі сыбайласы сотталды.

Сот материалы бойынша, аталған бөлім басшысы коммуналдық мекемесінің директорымен сөз байласып, өзінің досына тиесілі мердігер мекемемен құбырдың жөнделгені туралы жалған құжаттар жасаған. Сөйтіп, үшеуі бюджет қаражатын өзара бөліп алған. Сотталушылар кінәні толық мойындап, ұрланған қаражатты мемлекетке қайтарған. Бірақ, жазадан қашып құтыла алмады.

 «Сот үкімімен Айдашевқа 2 жыл 6 ай, Советоваға 2 жыл бас бостандығынан айыру жазасы тағайындалды. Сотталушылардың екеуі де өмір бойына мемлекетік қызметте еңбек ету құқығынан айырылды. Тілеуғалиге 3 жыл мерзімге пробациялық бақылау орнатыла отырып, бас бостандығын шектеу жазасы тағайындалды», - дейді Ақтөбе облыстық сотының баспасөз хатшысы Гүлжанар Отарбаева.

 

×
Бұл желілік ресурстың ақпараттық өнімдері 18 жастан асқан адамдарға арналған.