Қазақстан халқының саны 19 млн 199 мың адамнан асты

2022 жылдың 1 мамырындағы көрсеткіш бойынша Қазақстан халқының саны 19 199,8 мың адам болды, деп хабарлайды Azattyq Ruhy.

Ұлттық статистика бюросының мәліметінше, жалпы халықтың ішінде қалалықтар саны 11 442,9 мың (59,6%) адам болса, ауылдықтар 7 756,9 мың адамды (40,4%) құрап отыр. Яғни, 2021 жылдың 1  мамырымен салыстырғанда халық саны 236,9  мың адамға немесе 1,2% өскен.

«2022 жылғы қаңтар-сәуірде республика халқының табиғи өсімі 2021 жылғы қаңтар-сәуірмен салыстырғанда  (88 мың адам) 9,8% кеміп, 79,3 мың адамды құрады. Табиғи өсімнің жалпы коэффициенті 1000 адамға шаққанда 12,54 адамды құрады», - делінген бюро хабарламасында.

АХАТ органдары ұсынған азаматтық хал актілері жазбаларындағы мәліметтерді өңдеу нәтижесінде, 2022 жылғы қаңтар-сәуірде дүниеге келгендер саны – 127 мың адам, бұл 2021 жылғы қаңтар-сәуірге (137,4 мың адам) қарағанда 7,6% аз көрсеткіш. Туудың жалпы коэффициенті 1000 адамға шаққанда 20,08 құрады.

Сонымен қатар аталған кезеңде қайтыс болғандар саны 47,7 мың адам болған. Бұл 2021 жылғы қаңтар-сәуірге (49,5 мың адам) қарағанда 3,6% аз. Өлім-жітімнің жалпы коэффициенті 1000 адамға шаққанда 7,54 адам болды.

«2022 жылғы қаңтар-сәуірде республикада 1 жасқа дейін шетінеген 1 113 нәресте тіркелді. 2021 жылғы тиісті кезеңмен салыстырғанда (1109 шетінеген нәресте) 0,4% артты. Нәресте өлім-жітімінің коэффициенті 1000 туғанға шаққанда 8,76 оқиғаны құрады», - делінген ақпаратта.

Көші-қон қызметі органдары ұсынған мәліметтерді өңдеу нәтижесінде, 2022 жылғы қаңтар-сәуірде елімізге тұрғылықты тұруға келгендердің тіркелу саны 5 122 адамды, елімізден кеткендердің саны 7 041 адамды, көші-қонның айырымы 1 919 адамды құрады.

«Еліміздегі негізгі көші-қон ТМД мемлекеттеріне байланысты болып отыр. ТМД елдерінен келгендердің және сол елдерге кеткендердің көшіп-қонушылардың жалпы санынан үлесі 85,3% және 80,1% құрады», - делінген хабарламада.

Ел ішінде қоныс аударатын көшіп-қонушылар саны 3%-ға кеміді. Өңіраралық қоныс аудару бойынша халық көші-қонының оң айырымы еліміздің 3 өңірінде: Алматы (11 577 адам), Нұр-Сұлтан (10 300 адам) және Шымкент (1 664 адам) қалаларында байқалды.