Тергеу изоляторында темекі ішінен марихуана табылды

Қызылордада тергеу изоляторына темекінің ішіне марихуана салып өтпекші болған азамат ұсталды, деп хабарлайды Azattyq Ruhy.

Қызылорда облысы қылмыстық-атқару жүйесіне қарасты ЗК-169/1 тергеу мекемесінде сәлемдемелерді қабылдау кезінде тыйым салынған зат анықталды.

Оқиға орнына дереу Қызылорда облыстық ҚПБ жедел тергеу тобы шақырылды. Арнайы топ тексеру барысында VEST темекісінің 200 данасын жеке-жеке пышақпен кесіп, қарап шыққан.

«Нәтижесінде  4 дана темекіден түсі жасыл, өзіне тән иісі бар, шөп тәрізді зат тәркіленді. Тәркіленген зат салмағы 2,76 граммды құрайтын кептірілген марихуана  екені анықталды», - деп көрсетті Қызылорда облысы бойынша ҚАЖД баспасөз қызметі.

Аталған дерек бойынша Қазақстан Республикасы ҚК 297 бабы 1 бөлігімен сотқа дейінгі тергеп-тексеру жұмыстары жүргізілуде.