Экология министрлігі елорданы басқан түтінге қатысты түсінік берді

Экология министрлігі бүгін күні бойы елорда сезіліп тұрған жағымсыз иістің қайдан шыққаны туралы мәлімет берді, деп хабарлайды Azattyq Rýhy.

Белгілі болғандай, 18 сәуірде Нұр-Сұлтан қаласын түтін басып қалған. Осыған байланысты «Қазгидромет» РМК-ның экологиялық мониторинг бекеттері ауада ластаушы заттардың тым көп болып кеткенін: 

1) күкіртсутегі бойынша: 1,1-3,2 ШЖК шегінен асып кетудің 38 жағдайын;

2) РМ2,5 (шаң) бойынша: 1,1-2,2 ШЖК шегінен асып кетудің 76 жағдайын;

3) РМ10 (шаң) бойынша: 1,1-1,2 ШЖК шегінен асып кетудің 7 жағдайын;

4) азот оксиді бойынша: 1,0-2,5 ШЖК шегінен асып кетудің 30 жағдайын;

5) азот диоксиді бойынша: 1,1-3,6 ШЖК шегінен асып кетудің 53 жағдайын тіркеді.

Ең көп ластанған аймақтар: азот диоксиді бойынша № 5 бекет (Тұран даңғылы 2/1), күкірттісутегі бойынша №8 бекет (Көктал ш/а), РМ2,5 бойынша №6 (Ақжол көшесі) мен № 7 (Түркістан көшесі) бекет аудандары. Нұр-Сұлтан қаласындағы атмосфералық ауаның жай-күйін бақылау 10 стационарлық бекетте жүргізіледі, оның ішінде 6-ы автоматты бекет және 4 қолмен сынама алу бекеті бар.  

«NASA картасына сәйкес, 16-17 сәуірде Павлодар және Солтүстік Қазақстан облыстарында өрт ошақтары байқалды. Сол өрт ошақтары өз кезегінде, бүгін елордада байқалған түтіннің пайда болуына әсер етуі мүмкін», - делінген Экология министрлігінің хабарламасында.

Сондай-ақ синоптикалық жағдайға келсек, болжам бойынша, алдағы күндері тұрақсыз ауа райы сақталады, жауын-шашын басым болады, 18, 20-21 сәуірде жел 15-20 м/с дейін күшейеді. Түнде ауа температурасының 5...7 градусқа дейін біртіндеп жоғарылауы, күндіз 15...17 градустан 10...12 градусқа дейін төмендеуі байқалады.