Дәурен Абаев елдегі туризмді дамыту жөнінде Андорра үкіметінің басшысымен кездесті

Azattyq Rýhy

Олар өзара тиімді ынтымақтастық жөнінде ниет білдірді

Дәурен Абаев елдегі туризмді дамыту жөнінде Андорра үкіметінің басшысымен кездесті

Қысқы және тау туризміне арналған дүниежүзілік 11-ші конгрес аясында ҚР Мәдениет және спорт министрі Дәурен Абаев Андорра Үкіметінің басшысы Хавьер Эспотпен, Андорра Сыртқы істер министрі Мария Убахпен және Андорра мәдениет және спорт министрі Сильвия Гонсалеспен кездесті. Бұл туралы Azattyq Rýhy Мәдениет және спорт министрлігіне сілтеме жасап хабарлайды.

Кездесу барысында Дәурен Абаев Қазақстанның үлкен аумағы туризмнің барлық түрін дамытуға мүмкіндік беретінін айтты. Өз кезегінде мемлекет визалық режимді жеңілдету, қолайлы инвестициялық ахуал жасау, инфрақұрылымды дамыту бағытында жұмыс жүргізіп келеді.

Министрдің айтуынша, бүгінгі таңда басым туристік аумақтар анықталды, оның ішінде елдің оңтүстік-шығысындағы таулы аудандар да бар. Мемлекет келесі қолдауды ұсынады: жер учаскелерін беру, инженерлік инфрақұрылыммен толық қамтамасыз ету (электр, жол, су), салықтан босату, жеңілдетілген несиелер беру, тау шаңғысы жабдықтары мен техникаларын сатып алу шығындарының 25% - ын өтеу және туристік нысандарды салу кезінде 10% қайтару. Сондай-ақ, инвестициялық преференциялар алу үшін басым аумақтарда жобаның шекті құны төмендетілді.

Өз кезегінде Андорра үкіметінің өкілдері елдің тау туризмін дамыту, осы салаға инвестициялар тарту, ыстық бұлақтарда спа-курорттар салу тәжірибесі туралы айтып берді.

Кездесу қорытындысы бойынша тараптар жемісті және өзара тиімді ынтымақтастық туралы ниет білдірді.

×
Бұл желілік ресурстың ақпараттық өнімдері 18 жастан асқан адамдарға арналған.