Үш млн украиналық босқын болып кетті – БҰҰ

Ресеймен арадағы шиеленістен кейін үш миллион украиналық босқын болып кетті. Бұл туралы БҰҰ Босқындар істері жөніндегі жоғарғы комиссары Филиппо Гранди Twitter-інде жазды, деп хабарлайды Azattyq Rýhy.

«Біз қорқынышты кезеңді өткізіп жатырмыз. Украинадан үш миллион адам босқын болып кетті. Соғыс дәл қазір тоқтауы керек», - деп жазды Филиппо Гранди.

Жағдайдың ауқымы мен жылдамдығына ескере отырып, БҰҰ мұны Екінші дүниежүзілік соғыстан кейінгі ең үлкен көші-қон дағдарысы деп атады. Өзге елдерге кеткен украиналық босқындардың жартысына жуығы балалар екені де айтылды.

«1,4 миллион бала. Соңғы мәліметтер 36 сағат бұрын жеткенін ескерсек, 18 күнде босқын балалар саны 1,5 миллионға жуықтайды. Күн сайын шамамен 73 мың бала, ал әр минут сайын 55 бала немесе әр секунд сайын бір бала Украина аумағынан шығып жатыр», - деді ЮНИСЕФ өкілі Джеймс Элдер.

Украиналықтардың жартысынан көбі Польша шекарасынан өтіп жатыр. Батыс БАҚ-тарының хабарлауынша, Варшава мен Краковтың қалалық билігі босқындарды қабылдау мүмкіндігі таусылғанын мәлімдеді. Мұндай жағдай Латвияда да болып отыр.

Айта кетейік, 10 наурызда Украина аумағынан 2,3 миллионнан астам адам кеткені хабарланған болатын.