Атырауда 16 жасар жасөспірім мектепке бомба қойылғаны туралы жалған хабар берген
Аталған дерекке қатысты іс құжаттары сотқа жолданды
Атырауда 16 жасар жасөспірім мектепке бомба қойылғаны туралы жалған хабар берген, Бұл туралы Атырау облыстық полиция департаментінің баспасөз қызметі мәлім етті, деп хабарлайды Azattyq Rýhy.
Департамент ақпаратына қарағанда, 5 наурызда мектептердің бірінің электронды поштасына сағат 08:52 шамасында белгісіз адамнан хат түскен. Хатта мектепке жарылғыш зат қойылғаны туралы жазылған. Бұл туралы мектеп басшылығы жедел басқару орталығына хабарлаған.
«Полиция қызметкерлері мектепте жедел тексеру жұмыстарын жүргізді. Тексеру нәтижесінде жарылғыш зат табылмады. Жалған хабар жіберген 16 жастағы жасөспірім анықталды. Оның айтуынша, сенбі күні үйінде отырып, қалжың үшін жарылғыш зат қойылғаны туралы жазған. Қазір жасөспірім анасымен бірге полицияға жеткізіліп, тергеуге алынды», - деп хабарлады департаменттің баспасөз қызметі.
Аталған дерекке қатысты іс құжаттары ҚР Қылмыстық кодексінің 273-бабымен (Терроризм актісі туралы көрінеу жалған хабарлау) сотқа жолданды.
