Ресей шекарасына дейінгі республикалық автожол шұрық-тесік күйде жатыр

Батыс Қазақстан облысында жол сапасы жыр болды. Ресей шекарасына дейінгі республикалық автожолдың жағдайы сын көтермейді, деп хабарлайды Хабар 24 арнасы.

 Күре жол ұзақ жылдан бері, шұрық-тесік күйде жатыр. Үгітілген асфальт, қар ерігенде түгі қалмайтын түрі бар. Тұрғындар талай мәрте шағым айтып келеді. Бірақ нәтиже жоқ. 

 «Подстепное-Фёдоровка-РФ шекарасы» бағытындағы республикалық автожолдың ұзындығы 144 шақырым. Күре жолдың әлеуметтік-экономикалық маңызы зор. Әсіресе трассаның Орал мен Ақсай қалалары арасындағы бөлігінде көлік ағыны бір сәт толастаған емес. Жол өткен ғасырдың 70-жылдары салынған. Содан бері жамау жұмыстары ғана болмаса, күрделі жөндеу мүлде жүргізілмеген. Дәл қазір асфальт деген аты ғана бар.

«Қазавтожол» өкілдері трассаны жөндеу үшін былтыр жобалық-сметалық құжаттар дайындалып, мемлекеттік сараптамадан өткізілгенін айтты. Сапасы жағынан бұл күре жолды 3-санаттан екіншіге көтеру көзделген. Алайда ұлттық компанияның филиал директоры жоба құны мен мерзімін дөп басып айтпады.

Тұрғындар күре жолдың күрмеулі мәселесі тезірек шешілгенін қалайды. Әйтпесе шұрық-тесік асфальттың енді бірер жылдан кейінгі күйін елестету қиын.