Бұрынғы Қорғаныс министрі екі айға қамауға алынды

Сот Қазақстанның бұрынғы Қорғаныс министрі Мұрат Бектановқа қатысты қамауда ұстауға санкция берді, деп хабарлайды Azattyq Rýhy.

«2022 жылғы 22 ақпанда Нұр-Сұлтан қаласының мамандандырылған ауданаралық тергеу соты күдікті М.К. Бектановқа қатысты екі ай мерзімге күзетпен ұстау түріндегі бұлтартпау шарасын санкциялады», - делінген сот хабарламасында.

Сотқа дейінгі тергеп-тексерудің басқа да деректері ҚІЖК-нің 201-бабына сәйкес жария етуге жатпайтыны атап өтілді.

Бұған дейін Мұрат Бектановтың уақытша ұстау изоляторына орналастырылғаны хабарланған болатын. 19 ақпанда Бас прокуратура бұрынғы Қорғаныс министріне қатысты қылмыстық кодекстің 452-бабы бойынша қызмет бойынша әрекетсіздік фактісі бойынша сотқа дейінгі тергеуді бастаған.