Таразда қоқыс полигонға сыймай, қоршауынан асып кетті

Azattyq Rýhy

Залал келген аумақтың көлемі ұлғайып, жайылым жерлерге де зияны тие бастады

Фото ашық дереккөзден

Таразда өріске шыққан мал қоқыстың үстінде жайылып жүр. Тұрғындар қалдықпен қоректенетін малдың арам қатып жатқанын айтады. Ал оның еті мен сүтін тұтыну түрлі ауруларға әкелуі мүмкін деп алаңдап отыр. Қазір қаладан шыққан қоқыс полигонға сыймай, қоршауынан асып кетті. Былтыр салынуы тиіс зауыт жобасы әлі күнге дейін жоқ, едеп хабарлайды Хабар 24 арнасы.

Есесіне залал келген аумақтың көлемі ұлғайып, жайылым жерлерге де зияны тие бастады.  Қазіргі есеп бойынша бұл полигонда 3 миллион тоннаға жуық қоқыс жиналған. Мұнда Тараз қаласынан шығатын қалдықтар төгіледі. Жыл өткен сайын көлемі ұлғайып жатыр. Облыс орталығынан жылына 50 мың тоннаға дейін қоқыс шығарылады.  Ал өңірде оны өңдейтін  бір де бір зауыт жоқ. Қазір 30 гектар алқап толып, маңайындағы жайылым жер ластанған. Желмен көтеріліп шашылған полиэтилен пакетінде сан жоқ. Ауыл халқы мұның төрт түлікке залалы тиіп жатқандығын айтады

Бұл мәселені шешуге облыс билігі дәрменсіз. Жергілікті мамандар 2019 жылдан бері әрекет еткенімен еш нәтиже шықпай тұр. Екі жыл бұрын Үкімет тарапынан Тараздан қоқыс өңдейтін зауыт салу туралы шешім шыққан. Алайда зерделеуге келген комиссия басқаша шешім шығарған көрінеді.

«Комиссия мүшелерінің шешімімен Тараз қаласынан шығатын қалдықтар аз болуына байланысты, тарифтері төмен болғандықтан және инфрақұрылымымыз дамымағандықтан қоқыс жағатын зауыттың қажеттілігі жоқ деп қорытынды берілген», - дейді Жамбыл облыстық табиғи ресурстарды және табиғат пайдалануды реттеу басқармасының бөлім басшысы Нағима Темірбекова.

Мамандардың айтуынша, қоқыс өңдеу зауытын салуға Тараздан шығатын қалдық жеткіліксіз. Ол үшін жылына кем дегенде 100-150 мың тонна қоқыс жиналуы тиіс. Оның үстіне тариф пен инфрақұрылым мәселесі де бар. Бір сөзбен айтқанда, инвесторлар бұл жобаға қызығушылық танытпай отыр.

 

×
Бұл желілік ресурстың ақпараттық өнімдері 18 жастан асқан адамдарға арналған.