Қаңтар оқиғасындағы 2285 қылмыстық істің 1674-і ұрлық пен тонауға қатысты

Azattyq Rýhy

Бұл жалпы тіркелген істердің 73 пайызын құрайды

Фото ашық дереккөзден

ҚР Ішкі істер министрлігі қаңтар трагедиясымен байланысты қылмыстық істердің статистикасын жариялады. Ресми мәліметке сай, 2285 қылмыстық істің 1674-і ұрлық пен тонауға қатысты, деп хабарлайды Azattyq Rýhy.

«Бүгінгі таңда ішкі істер органдары тергеушілерінің іс жүргізуінде 2 285 қылмыстық іс бар. Оның негізгі бөлігін ұрлық пен тонау құрайды. Бұл 1674 іс немесе жалпы тіркелген істердің 73%-ы», - деп жазады министрліктің баспасөз қызметі.

 Ішкі істер министрлігінің ақпараты бойынша, кәсіпкерлерден тәртіпсіздіктен зардап шеккені туралы арыз-шағымдар әлі де түсіп жатыр.

«Бүгінгі күні жаппай тәртіпсіздіктер кезінде зардап шеккен объектілердің саны 1573-ке жетті. Бұл сан өтініштер есебінен артты. Әр өтініш бойынша тергеушілер зардап шеккен нысанған барып, зақымдалған объектілерді тіркеуге алады. Зардап шеккен бизнес объектілердің саны 1502-ге жетті. Көбінесе дүкендер, ломбардтар, жанар-жағармай құю станциялары мен қоғамдық тамақтану объектілері, аңшылық дүкендер қатты тонауға түскен», - деп жазылған ресми мәліметте.

Уақыт өткен сайын тәртіпсіздік кезінде қирады деген қорытынды шығарылған көліктер саны да артып жатыр.

«Зақымдалған немесе қираған көліктің саны да артып, 765-ке жетті. Оның 551-і полицияға, 124-і қарапайым азаматтарға тиесілі. Жалпы мәлімделген шығын 88 миллиард теңгеден асты. Лаңкестік актілер мен жаппай тәртіпсіздіктердің себептері, оларды ұйымдастырған тұлғаларды анықтау бойынша тергеуді арнайы прокурорлар жетекшілік ететін ведомствоаралық жедел-тергеу топтары жүргізеді. Өз кезегінде ішкі істер органдары жаппай тәртіпсіздіктер аясында жасалған басқа да қылмыстар бойынша тергеуді жалғастыруда», - деп жазады ІІМ баспасөз қызметі.


 

 

×
Бұл желілік ресурстың ақпараттық өнімдері 18 жастан асқан адамдарға арналған.