Жаппай тәртіпсіздік салдарынан бизнеске келген шығын 92 млрд теңгеден асты

Елдегі жаппай тәртіпсіздіктер кезінде бизнеске келтірілген шығын көлемі 92,3 млрд теңгеден асты. Бұл туралы «Атамекен» ҰКП баспасөз қызметі мәлімдеді, деп хабарлайды Azattyq Rýhy.

Палатаның баспасөз қызметі таратқан мәліметте: «9 қаңтар, сағат 09.00-дегі жағдай бойынша, сall-орталыққа 2320 қоңырау келіп түсті. Оның ішінде: тонау мәселелері бойынша – 1127, форс-мажор бойынша – 26, блок-бекеттер бойынша – 2, жеке тұлғалардың қоңыраулары бойынша – 1052 өтініш берілді. Еліміздің 10 өңірінде 1351 объектіде орналасқан 1181 бизнес нысаны зардап шеккен. Оның ішінде Алматыда – 1091 объектіде орналасқан 935 субъект бар», - делінген.

Кәсіпкерлер палатасының ақпараты бойынша, сауда саласында – 1122; қоғамдық тамақтандыру саласында – 17; қаржы секторында – 31, логистика саласында – 8 нысан зардап шеккен.

 «Залалдың жалпы сомасы, шамалап есептеулер бойынша, 92,3 млрд теңгеден асты. Алматыдағы шығын 90,7 млрд теңге көлемінде», - делінген хабарламада.