«Қазгидромет» алдағы күндерге арналған ауа райы болжамын жариялады

«Қазгидромет» алдағы күндері ел аумағында көктайғақ, ауа райы желді болуы мүмкін екенін мәлім етті, деп хабарлайды Azattyq Rýhy.

«Ақ теңіз аумағынан жылжып келе жатқан Солтүстік-Батыс циклон, республикамыздың батысында жауын-шашын (көбінесе қар) тудырады, содан кейін шығыс бағытта жылжып республиканың қалған бөлігіне жетеді. Тек Алматы, Павлодар және Шығыс Қазақстан облыстарында жауын-шашынсыз ауа райы сақталады», - делінген хабарламада.

Синоптиктердің хабарлауынша республика бойынша жел 15-23 м/с дейін күшейеді, батыс және оңтүстік өңірлерде көктайғақ, солтүстік және орталық өңірлерде бұрқасын күтіледі.

«Жалпы республика бойынша ауа температурасының біртіндеп жоғарылауы және аяздың бәсеңдеуі күтіледі. 3 қаңтарда еліміздің солтүстік жартысында ауа температурасы түнде 10...18, күндіз 3-8 градус аяз болады, оңтүстік жартысында термометр бағанасы 0-5 градусқа жетеді, кей жерлерде 0 ... 10 аяз, күндіз 3 ... 13 жылы болуы мүмкін», - делінген «Қазгидромет» хабарламасында.