«Дауыл шығындарына мұғалімдердің жалақысы жұмсалған жоқ»: Жамбыл облысының әкімі ұстаздардың кешеуілдеген жалақысына қатысты түсініктеме берді
Желтоқсан айына қосымша қаржы керек. Қазір Білім министрлігімен жұмыс жүргізіліп жатыр
Жамбылдық мұғалімдер қараша айының жалақысын толық ала алмай отыр. Бұл туралы жергілікті журналист Руслан Бақытбекұлы өзінің Facebook парақшасында жазды, деп хабарлайды Azattyq Rýhy тілшісі.
«Жамбылдық мұғалімдер жалақыларын әлі толық алған жоқ!!! Ала алмай отырғандарына 10 күнге жуықтады. ПЕДшеберлік т.б үшін республикалық бюджеттен берілетін айлық түскен көрінеді. Ал облыстық бюджеттен берілетін негізгі жалақы әлі берілмей отыр. Ашып айтуға мұғалімдер сескенеді. Ұстаздардың арасында «Облыстық бюджеттің ақшасы өткен жолғы дауылдан қираған ғимараттарды қалыпқа келтіруге жұмсалып кеткен» деген ақпар желдей есіп жүр», – деп жазды автор.
Бүгін Нұр-Сұлтан қаласындағы Орталық коммуникациялар қызметінің баспасөз алаңында есеп берген облыс башысы Бердібек Сапарбаев аталған мәселеге қатысты түсініктеме берді.
«Мұғалімдердің қараша айындағы жалақысы толығымен төленді. Қазір біз Үкіметпен бірлесіп жұмыс істеп жатырмыз. Желтоқсан айына қосымша қаржы керек болады. Қазір Білім министрлігімен жұмыс жүргізіліп жатыр. Үкімет басшысы желтоқсан айында төленетін жалақы толығымен берілетінін айтты. Ал 18-19 қарашада болған шығындарға мұғалімдердің жалақысы жұмсалды деген жалған ақпарат», – деді Бердібек Сапарбаев.
