Қызылорда әкімі: кен орындары сарқылып, мұнай өндіру көлемі қысқарды

Қызылорда облысында жұмыс істеп тұрған кен орындарының сарқылуына байланысты мұнай өндіру көлемі қысқарды, деп хабарлайды Azattyq Rýhy тілшісі.

ҚР Президенті жанындағы Орталық коммуникациялар қызметі алаңында облыс әкімі Гүлшара Әбдіқалықова осы жылдың қорытындысын баяндады.

«Облыс экономикасы 0,1%-ға артты. Оның ішінде өңдеу өнеркәсібіне тартылған инвестиция көлемі артты – 2,6 есе өсті. 2007 жылы өңірде ең жоғары өндіру көлемі 11,7 млн тоннаны құрады. Биыл болжам бойынша 4,2 млн тонна мұнай өндіріледі. Жаңа кен орындарын іздеу мақсатында биыл Арал теңізі акваториясының «Батыс» және «Шығыс» учаскелерін, сондай-ақ, Сырдария шөгінді бассейні аумағының бір бөлігін сейсмикалық барлау бойынша жоба-сметалық құжаттама әзірлеу аяқталады. 2022 жылы сейсмикалық барлау жұмыстары басталатын болады», ˗ дейді облыс әкімі.

Белгілі болғандай, биыл құны 45 млрд теңгені құрайтын 4 жоба іске аспақ. Олардың қатарында Қызылорда қаласындағы шыны зауыты және Жаңақорған ауданында «Шалқия» кен орнында тау-кен байыту комбинатының (235 млрд теңге) және Арал ауданында кальцийленген сода зауытының (93,5 млрд теңге) құрылысын бастау жоспарланған.

Еркежан Айтқазы, Нұр-Сұлтан қаласы