«Жүздеген миллиондарды имидждік бағытқа жұмсамай, балалар спортын дамыту керек»: Аружан Саин Түркістан облысындағы жағдайға шүйлікті

Бала құқықтары жөніндегі уәкіл Аружан Саин Түркістан облысында спорт секцияларының орнына биліктің имидждік іс-шараларға жүздеген миллион жұмсап отырғанын сынға алды. Бұл туралы Аружан Саин Үкімет жанындағы кәмелетке толмағандардың істері және олардың құқықтарын қорғау жөніндегі ВАК отырысында сөз қозғады.

Балалар омбудсмені Аружан Саин спорттық үйірмелер мен секцияларды аралау арқылы бұзақылық мәселесін шешуді ұсынды. Дегенмен, оның айтуынша, облыста бұл бағытта әлі де тиісті қаржыландыру жоқ.

"Сіздердің қолдауларыңыз осы мақсатқа бөлетін бюджетте көрсетілуі керек. Облыста 870 мың бала бар болғанымен, 241 секция мен үйірме ғана тіркелген. Спорт бойынша секциялар мен үйірмелерге - 93 миллион, мәдениетке - 117 миллион 321 мың бөлінген, бұл өте аз", - деді бала құқықтары жөніндегі омбудсмен.

Сонымен қатар, Саин аймаққа қосымша бюджет бөлу үшін Үкімет шешімі қажет емес, "ішкі шешімдер жеткілікті" екенін атап өтті.

"Сіз біздің балаларымызды құрбан ете отырып, кәсіби командаларды қаржыландырасыз. Мәдениет басқармасы, спорт басқармасы кәсіби командаларды қаржыландырмауы керек және жүздеген миллиондарды имидждік брендтерге бағыттамай, керісінше кәсіпкерлерді, мұғалімдерді, жаттықтырушыларды секциялар мен үйірмелерге тартуы керек. Билік тарапынан көмек керек", - деп түйіндеді Аружан Саин.