Елордалықтар жүргізуші куәлігін алу үшін практикалық емтихан тапсыра алмай жүр

Автордың айтуынша, ол жүргізуші куәлігін алу мақсатында практикалық емтиханды тапсыруға осымен екінші рет келіп тұр. Алғашқыда көліктердің бұзылып қалғандығы хабарланып, емтихан кейінге шегерілген. Алайда бұл жолы да жағдай еш өзгермепті.

«Біз автодромда тұрмыз. Мұнда екі көлік бар: бірі автомат, екіншісі механика. Екеуі де істен шыққан. Қашан жөнделетіні белгісіз. Емтихан тапсыратын механика және автомат көліктері мұнда бір-бірден ғана. Ал көліктерді жөндейтін және қызмет көрсететін компания Алматыда екен. Шамамен үш күн күту керектігін айтты. Осымен екінші мәрте келіп тұрмын», - дейді автор.

Azattyq Rýhy тілшісі «Азаматтарға арналған үкімет» КЕАҚ баспасөз қызметіне хабарласып, мән-жайды анықтады. Белгілі болғандай елордадағы МХҚО-да практикалық емтихан тапсыруға арналған жалғыз ғана автодромда көліктер расымен де бұзылып қалған екен.

«Елордалық автодром алғашқылардың бірі болып іске қосылғандықтан, ондағы емтихан тапсыруға арналған машиналарда орнатылған датчиктердің модельдері ескірген және қазіргі уақытта өндірістен шығарылған. Осыған байланысты бұл датчиктерді тек жөндеуге болады. Мемлекеттік корпорация келесі жылы автодромды жаңарту үшін қаражат қарастырып отыр, содан кейін ғана емтихан тапсыру үшін автомобильдер санын көбейту мүмкін болады», - деп жауап берді Азаматтарға арналған үкімет» КЕАҚ баспасөз қызметі.

Елордалық мамандандырылған ХҚО-ға көлік жүргізу емтиханын тапсыру үшін күніне 50-ден астам адам келеді екен. Әрбір емтихан тапсырушы азаматқа 40 минут бөлінеді. Тиісінше, орта есеппен автодром көліктің белгілі бір санатына қарай күніне 30 адамды қабылдай алады.

«Мемлекеттік корпорация жақын арада емтихан автомобильдеріне GPS-жабдық арқылы бақылау жүйесін орнатуды жоспарлап отыр. Бұл істен жиі шығатын датчиктерді сатып алмауға мүмкіндік береді», - деп мәлімдеді баспасөз қызметі.

Ал қазіргі бұзылған көліктерді жөндейтін мамандар Алматыдан келеді екен. Өз кезегінде елордалық МХКО автодромдағы техникалық ақаулар ертең жойылады деп сендірді.

Әсел Оршыбекова, Нұр-Сұлтан