Алматыдағы «Алтын Орда» базары жанындағы жол құрылысы қазан соңында аяқталады

«ҚазАвтоЖол» ұлттық компаниясы Алматыдағы «Алтын Орда» базары жанындағы жол айырығының құрылысы қазан айында аяқталатынын мәлімдеді, деп хабарлайды Azattyq Rýhy.  

«Бүгінгі күні «Алматы-Бішкек» автожолының 786-790 шақырымы аралығында (16-19 шақырым «Алтын Орда») «Райымбек-Алматы» учаскесінің көлік жүретін бөлігін кеңейту жұмыстары тәулік бойы жүріп жатыр. Құрылысқа 215 жұмысшы мен 30 техника жұмылдырылды»,- делінген «ҚазАвтоЖол» баспасөз хабарламасында.

Қазіргі уақытта негізгі күш магистральды эстакадаға бағытталған. Оның ішінде, нысанның сол жағын бетондау жұмыстары толық бітті. Ал оң жақ тұсының 100 метр аумағына бетон құйылды.

Сондай-ақ монтаждау, қалыпты орналастыру, торлау жұмыстары қарқынды жүріп жатыр.

«Эстакадағы негізгі жұмыс жоспар бойынша жүргізілуде, кестеден кешігу жоқ. Нысан құрылысы биылғы жылдың қазан айының соңына қарай аяқталады»,- делінген хабарламада.