Елімізде әйел жолаушыларға арналған вагон билеттері сатыла бастады

10 қазаннан бастап «Жолаушылар тасымалы» АҚ әйел адамдар үшін жол жүру құжаттарын (билеттерді) ресімдеу бойынша жаңа қызметті іске қосты, деп хабарлайды Azattyq Rýhy.   

«Жобаны іске асыру үшін №77/78 «Алматы – Маңғыстау» және №351/352 «Алматы-1 - Өскемен» жолаушылар пойыздарында бір купе вагоны іске қосылды. BILET.RAILWAYS.KZ сайтында немесе «Жолаушылар тасымалы» АҚ билет кассаларында теміржол билетін рәсімдеу кезінде «ЖН» (әйелдер) белгісі болған жағдайда ол вагон тек қана әйел жолаушыларға (толықтай вагонға) арналғанын білдіреді. Сондықтан ер жолаушылар пойыз билетін сатып алғанда абай болуы керек. Бұл ретте аталған вагонға еріп жүретін адам болған кезде 7 жасқа дейінгі ер балаларды ресімдеуге рұқсат етіледі», – делінген «Қазақстан темір жолы» ҰК» АҚ баспасөз хабарламасында.

Бірінші рейске (№77 – 58п. пойызы, №351– 34п. пойызы) 10 қазанда «әйелдер»  вагонына 92 жолаушының жол жүру құжаты (билеті) рәсімделді. 

«Әйел жолаушылар тарапынан осы қызметке сұраныс болған жағдайда, компания Қазақстан ішіндегі маршруттардың ауқымын кеңейтуге және өз клиенттері тарапынан ұсыныстарға дайын», - делінген хабарламада.