Нұр-Сұлтанда оқу жылы басталғалы бері 2,2 мыңнан астам оқушы коронавируспен ауырды

Елордада эпидемиологиялық жағдайдың жақсаруына қарамастан, елорда алты айдан бері «қызыл» аймақтан шығар емес. Қалада тәулігіне орташа есеппен коронавирустық инфекциямен сырқаттанудың 200-ден астам жаңа жағдайы тіркеледі, деп хабарлайды Azattyq Rýhy.

Мәселен, елордада COVID-19 жұқтырған науқастар арасында ересек тұрғындар үлесі 79,7%-ды құрайды, оның 20,3%-ы - 30-39 жас, 27,8%-ы - 40-59 жас, 20,1%-ы - 18-29 жас аралығындағы азаматтарға тиесілі. Ал 11,5%-ы - 65 жастан асқандар.

«Қыркүйек айында ауру жұқтырған балалардың үлес салмағы 16%-дан 24,3%-ға дейін, жасөспірімдердің үлес салмағы 2,5%-дан 5,4%-ға дейін өсті, науқас оқушылардың үлесі 2,3%-дан 20%-ға дейін өсті. Оқу жылының басынан бері COVID-19 жұқтырған оқушылар саны 2232-ні құрады, бұл халықтың жалпы санының 19,6%-ы және оқушылардың жалпы санының 1%-ы. Олардың 642-сі немесе 29%-ы мектепке барғанға дейін ауырып қалса, оқушылар арасында 1590 жағдай мектепте оқу басталғаннан бері тіркелген», - деді елорданың бас мемлекеттік санитарлық дәрігері Сархат Бейсенова.

Сондай-ақ, санитарлық дәрігер ауру деңгейінің төмендеуіне және вакцинацияланған азаматтар санының өсуіне байланысты карантиндік шаралардың жеңілдетілгенін еске салды.