Қазақстанда жария лауазымды тұлғалардың мүлкі мен ақшалай операциялары тексерілмек

Қазақстанда жария лауазымды тұлғалардың ақша операциялары мен мүлкін тексеруді ұсынды, алайда бұл тізімге кім кіретінін мемлекет басшысы анықтауы тиіс, деп хабарлайды LS.

Мәжілісмендер кірістерді жылыстатуға қарсы күрес бойынша заң жобасын ұсынды, онда шенеуніктердің кейбір санаттары үшін қосымша тексерулер туралы нормалар көзделген.

"Заң жобасында жария лауазымды тұлғалар жүзеге асыратын ақшамен және өзге мүлікпен операциялар бойынша бақылау белгіленеді. Бұл адамдардың тізімін президент өзі бекітеді. Ал қаржы мониторингі агенттігі өз кезегінде бұл адамдардың, олардың отбасы мүшелерінің және жақын туыстарының жеке тізімін жүргізетін болады", - деді мәжілісмен Сергей Симонов.

Ол қаржы мониторингі субъектілерінен тиісті қызметтерді алу кезінде Қазақстанның шетелдік және жария лауазымды тұлғалары қосымша тексеруге ұшырайтынын түсіндірді.

Өз кезегінде мәжілісмен Фахриддин Қаратаев жақын ортадан кімнің тексеріске түсуі мүмкін екенін нақтылауды сұрады.

"Отбасы мүшелері мен жақын туыстар туралы түсінік біздің заңнамада әртүрлі түсіндіріледі. Осыған орай менде сұрақ туындайды. Айтыңызшы, олардың жақын туыстарына кім нақты кіреді?" - деп сұрады ол.

Бұл туралы мәжілісмен Симонов бұл тізімге ерлі-зайыптылар, ата-аналары, балалары, бауырлары, әпкелері, аталары мен әжелері және немерелері деп жауап берді.

"Жария тұлғалардың қатарына жауапты мемлекеттік лауазымды атқаратын адамдар, мемлекеттік функцияларды орындауға уәкілеттік берілген лауазымды адамдар, сондай-ақ, мемлекеттік кәсіпорындар мен квазимемлекеттік сектордың субъектілерін басқарушылары жатады. Заң жобасы қабылданғаннан кейін президент олардың тізімін бекітетін болады. Сондықтан, қазір мен оның құрамына кім кіретінін нақты айта алмаймын", - деп түсіндірді депутат.

Бұл ретте ақшаны жылыстатуға қарсы күрес жөніндегі халықаралық қаржылық шараларды әзірлеу тобының (FATF) халықаралық стандарттарына сәйкес ұлттық жария тұлғаларға өз елі шегінде мемлекетті басқару функциялары берілген адамдар жатады. Олардың қатарында мемлекет және үкімет басшылары, үкіметтің аға қызметкерлері, сот және әскери қызметкерлер, көрнекті саяси қайраткерлер, сондай-ақ, мемлекеттік корпорациялардың басшылары бар.