«Бизнес по-казахски» фильміне түскен актер қайтыс болды

Танымал үнді актері Сидхарт Шукла 2 қыркүйек күні Мумбай қаласында қайтыс болды. Ол небәрі 40 жаста еді, деп хабарлайды Azattyq Rýhy тілшісі.

Hindustan Times басылымның мәліметінше, кеше актер инфаркт алып, жедел ауруханаға жеткізілген. Дәрігерлер оның өмірін құтқара алмады.

«Өлімнің алдын-ала себебі – инфаркт. Аутопсиядан нақты себебін анықталады», - деді аурухананың сот-медициналық бөлімінің дәрігері.

Актердің қайтыс болуы туралы жаңалық Болливуд индустриясының танымал тұлғалары және телекөрермендер үшін ауыр соққы болды.

Сидхарт Шукла 1980 жылы 12 желтоқсанда Мумбайда дүниеге келген. Мансап жолын модель ретінде бастаған. 2005 жылы Түркияда өткен «Әлемнің үздік моделі» байқауында ол Үндістан атынан шығып, Азия, Латын Америкасы және Еуропадан келген 40 сайыскерден басым түсіп, титулды жеңіп алған алғашқы үнді азаматы болған еді.

2008 жылы кинода дебют жасаған. «Я – любовь», «Невеста», «Воин», «Бизнес по-казахски» фильмдеріне түскен.