Сайлау:Ақмола облысында сайлаушылардың 59% дауыс берді

Жанармай құю бекеттеріне дизель отынының бағасын төмендету міндеттелді

Бәсекелестікті қорғау агенттігі бірқатар өңірде бағаның төмендегені туралы хабарлады

Фото: ашық дереккөзден

Жанармай құю станциялары монополияға қарсы ведомствоның дизель отынына бағаны төмендету жөніндегі талаптарын орындады, деп хабарлайды Azattyq Rýhy.

Бұған дейін мамыр айынан бастап еліміздің оңтүстігінде дизель отынына бағаның өскені туралы хабарланған болатын. Осы орайда, Қазақстан Республикасы Бәсекелестікті қорғау және дамыту агенттігі жүргізілген талдау қорытындысы бойынша дизель отыны бағасының өсуі алыпсатарлық сипатқа ие екенін анықтады.

«Осыған байланысты, 19 АЖҚС-қа дизель отынына бағаны төмендету арқылы сөз байласу белгілерін жою қажеттілігі туралы хабарлама жіберілді. Хабарламаны орындау мерзімі оны алған күннен бастап күнтізбелік 30 күнді құрайды. Хабарламаны орындамау монополияға қарсы тергеу жүргізуге негіз болады.  Бұл хабарламаларды нарық субъектілерінің көпшілігі мерзімінен бұрын орындады және бағаны төмендетуге дайын екенін хабарлады», - делінген ведомство хабарламасында.

Нұр-Сұлтан, Алматы, Шымкент қалалары мен Қызылорда, Жамбыл, Түркістан, Алматы облыстарында әр литр бағасы 2-ден 5 теңгеге дейін төмендетілді.   

Сондай-ақ, Qazaq Oil, Gas Energy бағаның оңтүстікте ғана емес, еліміздің басқа да бірқатар өңірінде төмендегені туралы хабарлады.

Ал Гелиос және Sinooil-ға жіберілген хабарламаларды орындау мерзімі әлі бар.

«Сонымен қатар, осы жылдың 1 шілдесінен бастап дизель отынына акциз бағасы тоннасына 540 теңгеден 9 мың 300 теңгеге дейін көтерілгенін атап өту қажет, бұл фактор кейін бағаға әсер етуі мүмкін. Бағалық сөз байласуға және ЖЖМ бағасының негізсіз өсуіне жол бермеу мәселесі Агенттіктің тұрақты бақылауында», - делінген хабарламада.