ШұғылCOVID-19: Бір тәулікте 720 адамнан коронавирус анықталды

БҚО-да полиция қызметкері қағып кеткен ер адам көз жұмды

Аудандық полиция бөлімінің аға инспекторы 56 жастағы тұрғынды 2 желтоқсанда қағып кеткен еді

Фото: ашық дереккөзден

Батыс Қазақстан облысында полиция қызметкері көлігімен қағып кеткен ер адам көз жұмды, деп хабарлайды Azattyq Rýhy тілшісі. 

Облыстық денсаулық сақтау басқармасынан түскен мәліметке қарағанда, ер адам Орал қалалық көпбейінді ауруханасының жансақтау бөлімінде қайтыс болды. Бұдан бұрын жазғанымыздай, оқиға Тасқала ауданы орталығында болды. 

Аудандық полиция бөлімінің аға инспекторы Сәкен Қазжанов 2 желтоқсан күні «Шевроле Нива» автокөлігімен 56 жастағы тұрғынды қағып кетіп, ер адам қалалық аурухананың жансақтау бөліміне жатқызылған еді. Полиция қызметкеріне қатысты ҚР ҚК 345-бабы 2-бөлігі (абайсызда адамның денсаулығына ауыр зиян келтіруге әкеп соққан жол жүрісі немесе көлiк құралдарын пайдалану қағидаларын бұзу) және 347-бабы 1-бөлігіне (жол-көлік оқиғасы болған жерден кетіп қалу) сәйкес қылмыстық іс қозғалған болатын. 

БҚО полиция департаменті баспасөз қызметінің нақтылауынша, С.Қазжанов қызметінен босатылды. Сондай-ақ аталған қылмыстық іс ҚР ҚК 345-бабы 3-бөлігіне (абайсызда адам өліміне әкеп соққан жол жүрісі немесе көлік құралдарын пайдалану қағидаларын бұзу) қайта дәрежеленді.