БҚО-да қызмет бабын асыра пайдаланған прокуратура қызметкері сотталды

Бөрлі аудандық сотында Қайрат Қайырмұхановқа қатысты үкім шығарылды, деп хабарлайды  Azattyq Rýhy тілшісі.

БҚО сотының баспасөз қызметінен түскен мәліметке қарағанда, Қ.Қайырмұханов ҚР ҚК 190-бабы 3-бөлігі 2-тармағына сәйкес айыпты деп танылып, 4 жылға бас бостандығынан айырылды. ҚР ҚК 46-бабы 5-бөлігі 2-тармағына сәйкес оған жазасын қауіпсіздігі орташа қылмыстық-атқару жүйесі мекемесінде өтеу белгіленді. Сонымен қатар ол өмір бойына мемлекеттік қызмет атқару құқығынан айырылды. 

Бөрлі ауданы прокуратурасының прокуроры қызметін атқара жүріп, Қ.Қайырмұханов Б. мен Ш-ны айыптау жөніндегі қылмыстық істің мән-жайын білген. Күдікті Б. қылмысын мойындап, жәбірленушіге залалын өтегендіктен, процессуалдық келісім жасауға, содан кейін сот үкімімен ҚР ҚК 63-бабына сәйкес оған шартты жазаның қолдануға болатынын білген Қ.Қайырмұханов қызмет бабын пайдаланып, «іске кіріскен». Аталған іс бойынша шешім қабылдауға құқығы болмаса да, оған қоса қылмыстық іс-әрекеті жөнінде аудан прокуратурасы басшылығы мен процессуалдық прокурорды хабардар етпестен Қ.Қайырмұханов М. деген танысы арқылы айыпталушыға ұсыныс жасаған. Яғни 2 млн теңге көлемінде ақшалай сыйақыға Б-ны бас бостандығынан айырмай, шартты жаза белгілеу туралы мәселені шешуге ықпал ете алатынын айтқан. М. мұнымен келісіп, 2 млн теңгенің тым көп екендігін, азайту керектігін жеткізген. Қайырмұханов бұған келісімін берген. Ақыры биылғы 20 ақпанда Қ.Қайырмұханов М-мен кездесіп, 1,5 млн теңге көлемінде сыйақы алған. 

Үкім заңды күшіне енген жоқ.