ШұғылҚазақстанда бір тәулікте 2549 адамнан коронавирус анықталды

«Елімді сағындым»: Германияға қоныс аударған отбасы Қазақстанға қайтып оралды

«Қазақстандағы бірлік пен береке әлемнің басқа ешбір елінде жоқ» дейді олар

Осыдан біраз жыл бұрын Қарағандыдан Германияға қоныс аударған Владимир Тауберт елге қайтып оралды, деп хабарлайды Azattyq Rýhy «Хабар 24» телеарнасына сілтеме жасап.

Қазақтың кең пейілі мен ұлан-ғайыр даласын сағыныпты. Кезінде ата-бабасы Қазақстанға жер аударылып келген екен. Владимир қазір жылқы баптап, мал шаруашылығын дөңгелетіп отыр.

Ереуіл атқа ер салып, еңку-еңку жер шалмаса, Владимирдің ісі бітпейді. Алты жасынан аттың бауырында өскен ол тұлпарды тұяғынан таниды. Дәл осындай асыл тұқымды 4 жылқысы бар. «Пайда үшін емес, жанның рахаты үшін ұстаймын» дейді. Қазақ пен тұлпарды егіз көреді. Германияда өткен 4 жылында өз елін, яғни қазақ даласын сағынғанын айтады.

«Германияда біз бір үйге қамалдық та қалдық. Еркіндік жоқ. «Өз үйім – өлең төсегім» дегенді сол кезде ұқтым. Қазағымның жерінде өзімді еркін әрі рахат сезінемін. 4 жылға жуық уақыт тұрдық та, әйеліме «елге қайтайық» дедім. Оның да күткені сол екен, қуана келісті. Германиядағы туыстарымыз аң-таң боп қалды, біз нағыз көшпенділер сияқты жиналдық та, көшіп кеттік», - дейді  Ошағанды ауылының тұрғыны Владимир Тауберт.

Владимирден кейін жалғыз ұлы да елге қайта оралады. Бүгінде жол бойында асхана ұстап, мал өсіріп, онға жуық адамды жұмыспен қамтып отыр. «Қазақстандағы бірлік пен береке әлемнің басқа ешбір елінде жоқ» дейді олар.

«Қайтып айтарымды да білмеймін. Ішімде бір сағыныш тұрып алды. Германияның маған климаты да, ауасы да жақты. Бірақ үйге қайтқым келді де тұрды. Барлық туыстарым сол жақта аң-таң болып қалды. Германияға тек қонаққа баруға болады, бірақ өмір сүру үшін Қазақстан жақсы», - дейді Владимирдің жары Эльвира Тауберт.

Ошағанды ауылының іргесі 1908 жылы неміс босқындары келе бастаған кезде құрылған. Қазір мұнда 500-ге жуық түтін бар. Жақында көшелерге жарық шамдар тартылып, су құбыры салынған. Владимир болса, ауылда қаңырап қалған тағы бірқатар нысанды жөндеп, қонақүй ашпақ. Осылайша, ауыл тұрғындарын жұмыспен қамтуды қалап отыр.