Елорданың мейрамханалары, барлары және дәмханалары жаңа жұмыс режиміне көшеді

Елордада карантиндік шектеулерді қатайту туралы жаңа қаулыға қаланың Бас мемлекеттік санитарлық дәрігері Сархат Бейсенова қол қойды. Қоғамдық тамақтану объектілеріне демалыс күндері жұмыс істеуіне тыйым салынады, деп хабарлайды Нұр-Сұлтан әкімдігінің ресми сайты.
Қол қойылған құжатқа сәйкес елорданың мейрамханалары, кафелері, барлары және асханалары жұмыс күндері таңғы 7-ден кешкі 22-ге дейін жұмыс істей алады. Демалыс күндері келушілерді қабылдауға тыйым салынады.

«Қоғамдық тамақтану объектілерінің жұмысын (мейрамханалар, дәмханалар, барлар, асханалар) орналасқан жеріне қарамастан, ғимараттардың ішінде толтырылуы 50%-ға дейін, бірақ 30 орыннан аспайтын шарттарды сақтаған жағдайда, бір үстелде 4-6 адамнан аспайтын отыру мен көрші үстелдердің шеткі орындары арасында кемінде 2 метр әлеуметтік қашықтықты сақтай отырып, күшейтілген санитариялық-эпидемияға қарсы, санитариялық-профилактикалық іс-шараларды сақтай отырып, тамақты жеткізу және шығару қызметін қоспағанда жұмыс күндері жұмыс кестесін сағат 7:00-ден 22:00-ге дейін және демалыс күндері жұмысына тыйым салумен ұйымдастыру», - делінген елорданың санитарлық дәрігерінің қаулысында.

Бұл ретте ұжымдық, салтанатты, отбасылық, естелік (банкеттер, үйлену тойлары, мерейтойлар, еске алу), мерекелік корпоративтер мен басқа да бұқаралық іс-шараларды ұйымдастыруға және өткізуге қатаң тыйым салынады.

Жаңа қаулы 2021 жылғы 30 наурызда күшіне енеді.

Естеріңізге сала кетейік, Нұр-Сұлтан 10 наурыздан бастап эпидемиологиялық ахуалды бағалау матрицасы бойынша «қызыл аймақта» орналасқан. Күн сайын қалада коронавирустық инфекцияның 300-ден астам жаңа жағдайы анықталады. Елорда тұрғындары мен қонақтарынан КВИ ауруының өсуіне жол бермеу үшін санитарлық нормалар мен карантиндік режим талаптарын қатаң сақтау талап етіледі.