ШұғылҚазақстанда өткен тәулікте 2656 адамнан коронавирус инфекциясы анықталды

Нұр-Сұлтанда кезекте тұрғандарға жеңілдікпен берілетін тұрғын үй салынады

2020 жылы 7 мыңнан астам әлеуметтік үй салынды

Елорда әкімі Алтай Көлгінов Instagram-дағы парақшасында жеңілдікпен салынатын баспаналар мәселесі қандай жолдармен шешіліп жатқанын мәлім етті, деп хабарлайды Azattyq Rýhy тілшісі.

«Тұрғын үй мәселесі - басым бағыт. Ірі жетекші құрылыс компанияларымен және Отбасы банкімен (тұрғын үй құрылыс жинақ банкі) бірлесіп, жеңілдікпен берілетін қолжетімді тұрғын үй салу туралы меморандумға қол қойдық. Олардың қатарында Bazis-A, BI-group, G-park, ҰАК және т.б. құрылыс компаниялары бар. Бұл келісім белгіленген баға бойынша 8 мыңнан астам жеңілдікпен берілетін пәтер салуға мүмкіндік береді, бұл - 500 мың шаршы метрден астам тұрғын үй! Қолжетімді әлеуметтік тұрғын үйге 160 млрд теңгеден астам инвестиция тартылады. Бұл тұрғын үйлер кезекте тұрған Отбасы банкінде шоттары бар азаматтарға арналған», - деп жазды ол.

Айтуынша, қол қойылған меморандум бірден бірнеше міндетті орындауға мүмкіндік береді.

«Атап айтқанда көп пәтер салып, сол арқылы кезекте тұрғандар санын қысқарту, инвестициялар есебінен құрылыс саласын ынталандыру, қосымша жұмыс орындарын құру. Мемлекет басшысының тапсырмасына сәйкес қолжетімді жеңілдікті тұрғын үй құрылысы көлемін ұлғайту бойынша жұмыс жүргізіп жатырмыз. Мысалы 2018 жылы 1100 әлеуметтік пәтер, 2019 жылы 2900 баспана салынса, 2020 жылы 7 мыңнан астам әлеуметтік үй салынды. Биыл бұл көрсеткішті 10 мың пәтерге дейін ұлғайтуды жоспарлап отырмыз», - деп жазды қала әкімі.