СҚО-да бірнеше тонна астық ұрлаған топ ұсталды

Солтүстік Қазақстанда серіктестік басшысының жұмысшыларымен бірігіп астық ұрлағаны әшкере болды, деп хабарлайды Azattyq Rýhy тілшісі astanatv.kz-ке сілтеме жасап.

Оқиға Жамбыл ауданындағы Преснов ауылында болған. Ұрылар астық қабылдайтын бекетті торып жүріп, қараңғы түнде бидайды тонналап шығарып жүрген. Келтірілген деректерге қарағанда, олар астықты сегіз жүк көлігімен шығармақ болған. Жарығын сөндіріп қойып, бидай тиеп жатқан кезде үстілерінен полиция түсіпті. Астық ұрлығына қатысты қылмыстық іс қозғалып, тергеу амалдары жүріп жатыр. 

«Тергеу әрекеттері барысында ұрланған өнімді сату орны анықталды. Күдіктінің үйінен конверттерге салынған ақшалай қаражат алынды. ҚР Қылмыстық кодексінің 188-бабы 4-бөлігі бойынша сотқа дейінгі тергеу жүргізілуде. Тәркіленген «КамАЗ» автокөліктері мен құжаттама да тексерілуде», - деді СҚО Жамбыл ауданы полиция бөлімінің бастығы Асан Мейрамов.