Алматыда иесіз қалған 450 трансформатор анықталды

Былтыр Алматыдағы 6 ауданда иесіз қалған 170 трансформатор қаланың коммуналдық меншігіне алынған болатын. Электр желілері қала әкімдігінің қаулысымен «Алатау Жарық Компаниясы» АҚ-на әрі қарай қызмет көрсету үшін тегін берілді.

Бүгінгі күні қаланың 7 ауданында иесіз жатқан инженерлік желілердің 450 нысаны анықталды Оның ішінде 146 дана ТП, 253,6 шақырым электр желілері, тағы 19,7 шақырым жылу және 66,4 шақырымға жететін су желілері бар. Кәріз желілерінің ұзындығы – 24,1 шақырым.

«Бұларды одан әрі қызмет көрсету үшін қаланың коммуналдық меншігіне беру туралы соттың шешімі бар. Алматы қаласы әкімдігінің қаулысымен 129 электр желісі «Алатау Жарық Компаниясы» АҚ-ға тегін берілді. Жалпы ұзындығы 50,7 шақырым болатын сумен жабдықтау желілерінің 77 нысаны мен ұзындығы 15,1 шақырым болатын 63 кәріз желілері «Алматы Су» МКК-на тегін беру туралы Алматы қаласы әкімдігінің қаулысы бар.

Жылумен жабдықтау желілерінің 49 нысанын да «Алматы жылу желілері» ЖШС-не тегін беру туралы Алматы қаласы әкімдігінің қаулысы дайын. Қазіргі кезде қабылдау-тапсыру актілерін дайындау бойынша жұмыстар жүріп жатыр», - деп хабарлады қала әкімдігінің баспасөз қызметі