Жамбыл облысында жыл басынан бері 3 тоннадан астам есірткі тәркіленді

Жамбыл облысының полицейлері жыл басынан бері заңсыз айналымнан үш тоннадан астам есірткі тәркіледі, деп хабарлайды Azattyq Rýhy тілшісі Polisia.kz-ке сілтеме жасап.

«21 қарашада полиция қызметкерлері 42 жастағы тұрғыннан 16 келіден астам кептірілген марихуана тауып, тәркіледі. Аталған дерекке қатысты ҚР ҚК 296-бабының 4-бөлігі (Аса ірі мөлшердегі есірткі, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау) бойынша сотқа дейінгі тергеу басталды. Күдікті өз кінәсін мойындады және қамауға алынды», - деп жазылған ақпаратта.

Сонымен қатар Жамбыл облысы полиция департаментінің Есірткі қылмысына қарсы іс-қимыл басқармасының қызметкерлері жыл басынан бері 785 қылмыстық құқық бұзушылық дерегін анықтады. Оның ішінде 120 есірткі өткізу дерегі, есірткіні аса ірі көлемде сақтаудың 59 дерегі, 5 есірткі контрабандасы, 4 есірткіні насихаттау немесе заңсыз жарнамалау және 574 қылмыстық теріс қылық дерегі бар. Полицейлер заңсыз айналымнан 3 тоннадан астам түрлі есірткіні тәркілеген.