Қазақстанда елдімекендердің тек 24 пайызы газбен қамтылған

Газ бен мұнайға бай Қазақстанда елдімекендердің 24 пайызы ғана көгілдір отынмен қамтылған. Бас энергетик Нұрлан Ноғаев бұл көрсеткішті жылдың соңына дейін 53 пайызға дейін көтереміз деп отыр, деп хабарлайды Azattyq Rýhy тілшісі «Астана» телеарнасына сілтеме жасап.

Энергетика министрі Нұрлан Ноғаевтың дерегіне қарағанда, бүгінде елімізде 6 мың ауылдың 4,5 мыңы газға зәру. Елорданың өзіне газдың келгені осы. Астананың қолы газға енді жетсе басқа өңірлерге неғайбыл. Шығысқа мысалы көгілдір отын мүлдем бармауы мүмкін. Нұрлан Ноғаевтың айтуынша, онда газ тарту экономикалық тұрғыда тиімсіз көрінеді. Сондықтан сұйық отын құбыры Ресейден тартылуы мүмкін.

«Қазіргі таңда бұл жобаны жүзеге асыру мүмкіндігін анықтау үшін «ҚазТрансГаз» АҚ мен «Газпром» арасында жұмыс тобы құрылып, бұл мәселе Ресей тарапымен пысықталуда», - деді Энергетика министрі Нұрлан Ноғаев.