АҚШ-тағы президент сайлауында Байден жеңіске жетті - БАҚ

CNN, NBC телеарналары мен AP агенттігі Джо Байденнің АҚШ-тағы президент сайлауында жеңіске жету үшін қажетті дауысты жинағанын мәлімдеді, деп хабарлайды Azattyq Rýhy тілшісі.

Бұқаралық ақпарат құралдарының хабарлауынша, Байден 273, ал Трамп 213 дауыс жинаған. Сайлаудың соңғы қорытынды нәтижесі 14 желтоқсаннан кейін белгілі болады.

Джо Байден Twitter парақшасында қажетті дауыс жинағанын мәлімдеді. 

«Америка, мені ұлы мемлекеттің басшысы етіп таңдағандарыңыз мен үшін зор құрмет. Алдағы жұмысымыз ауыр болмақ, бірақ мен маған дауыс берген, бермегендеріңізге қарамастан, бәрінің президенті боламын», - деп жазды ол.

Айта кету керек, бұл сайлауда Джо Байден АҚШ тарихында осы лауазымға үміткер болған бүкіл кандидаттардан көп дауыс жинады. AP мәліметіне сенсек, қазіргі таңда саналған бюллетеньдердің 74,8 миллионы Байденге дауыс берген. Ал 70,5 миллион сайлаушы Дональд Трампты қолдаған.