Еліміздегі ауыл шаруашылығы өндірісінің көлемі 4,4 трлн-ға жетті – ҚР АШМ

Биыл  9 айындағы қорытыныдысы бойынша ауыл шаруашылығы өнімінің жалпы көлемі 5 пайызға артып, 4,4 трлн теңгені құрады. Бұл туралы АШМ Сапархан Омаров Үкімет отырысында мәлімдеді.

Министрдің айтуынша, негізгі өсім өсімдік шаруашылығына тиесілі. Нақтырақ айтқанда бұл бағыттағы өндіріс көлемі 7%-ға (2,5 трлн теңгеге) артқан. Ал мал шаруашылығының жалпы өнім көлемі 2,7%-ға өсіп, 1,9 трлн теңгені құраған. Бұл ретте тірі салмақта ет өндіру көлемі 3,8%-ға, сүт өндірісі 3%-ға өскен екен.

«Азық – түлік өндірісі 3,5%-ға (1,4 трлн теңгеге) дейін ұлғайды. Өңделген күріш өндірісі 54,5%-ға (149,9 мың тоннаға дейін), шұжық өнімдері – 19,6%-ға (43,5 мың тоннаға дейін), сары май – 14,2%-ға (17,3 мың тоннаға дейін), құс еті – 11,4%-ға (78,9 мың тоннаға дейін), жарма – 10,9%-ға (66,9 мың тоннаға дейін), макарон өнімдері – 10,9%-ға (136,2 тонна), ұн – 7,4%-ға (2,4 млн тоннаға дейін), ашытылған сүт өнімдері – 5,2%-ға (165,9 мың тоннаға дейін) өсті.» - деді Сапархан Омаров.

Сондай-ақ, министр өз баяндамасында ауыл шаруашылығының негізгі капиталына салынған инвестициялар 15,1%-ға артып, 380 млрд теңгеден асқанын айтты. Дәлірек айтқанда азық-түлік өндірісі саласына құйылған  инвестициялар 17,2%-ға артып, соның нәтижесінде 65 млрд теңгеге жеткен.