БҚО-да білім беру мекемелері жылыту маусымына толық дайын емес

Бүгінде республика бойынша 11 158 білім беру нысаны жылу беру маусымына дайын. Бұл – барлық нысанның 99,6%-ы. Индустрия және инфрақұрылымдық даму министрі Бейбіт Атамқұлов өңірлер бойынша БҚО-да дайындықтың төмен екенін атап өтті.

«Білім беру нысандары бойынша Батыс Қазақстан облысында дайындық қарқыны төмен екені байқалады. Облыстағы барлық нысанның 4,8%-ы әлі дайын емес», - деді министр Үкімет отырысында.

Сондай-ақ ведомство басшысы денсаулық сақтау нысандарының жылыту маусымына дайындығы бойынша БҚО мен Шымкент қаласының әзірлігі төмен екенін атап өтті. 

«Екі өңірде объектілердің жылыту маусымына дайындығы төмен екені байқалады: Батыс Қазақстан облысындағы денсаулық сақтау мекемелерінің 90,7 %-ы және Шымкент қаласының 93,6%-ы жылыту маусымына дайын», - деді ИИДМ басшысы.

Жалпы, республика бойынша жылу беру маусымына денсаулық сақтау нысандарының 99,2%-ы дайын, бұл 5 963 нысан (барлығы 6 007 нысан).

Сымбат Молдатай, Нұр-Сұлтан