Қазақстандық теннисші Испаниядағы турнирдің жеңімпазы атанды

Қазақстандық Тимофей Скатов Испаниядағы Мелилье ITF турнирінің жеңімпазы атанды, деп хабарлайды Azattyq Rýhy тілшісі Prosport.kz-ке сілтеме жасап.

«Дүниежүзілік рейтингте 472-орында тұрған 19 жастағы қазақстандық теннисші доданың екінші ракеткасы болып тіркеліп, барлығы бес кездесу өткізді. Соның ішінде Т.Скатов жартылай финалда Нидерланд өкілі Макс Хаукесті 6:2, 6:1 есебімен тізе бүктірді. Финалда рейтингте 724-сатыдағы даниялық Хольгер Рунемен бас жүлдені сарапқа салды», - деп жазылған ақпаратта.

Бірінші партияда даниялық спортшы басым түсті – 6:3. Екінші сетте Т.Скатов қарсыласына бірде-бір гейм берген жоқ – 6:0. Үшінші, шешуші партияда қазақстандық теннисші брейкпен алға кетті – 2:1. Тағы бір брейк – 4:1. Т.Скатов матчты тағы бір брейкпен түйіндеді – 6:1.