Қазақстандықтар зейнетақы жинақтарын алу үшін салық төлейтін болады
Салық 10 пайызды құрайды
Зейнетақы жинақтарын алуды шешкен қазақстандықтар салық төлейді, деп хабарлайды Azattyq Rýhy тілшісі.
Салық Кодексінің 326-бабына сәйкес, жеке табыс салығы салынатын табыстарға Бірыңғай жинақтаушы зейнетақы қоры салық төлеушілердің зейнетақы жарналары есебінен қалыптастырылған зейнетақы жинақтарынан жүзеге асыратын төлемдер жатады. Салық зейнетақы қорынан алынатын соманың 10 пайызын құрайды.
«Жеке тұлғалар бір ең төменгі жалақы мөлшерінде салық шегерімдерін қолдана отырып, салық салынатын соманы азайтуға құқылы. Халықтың әлеуметтік осал топтары (ҰОС қатысушыларына теңестірілген, барлық топтағы мүгедектер, мүгедектердің ата-аналары мен қамқоршылары, жетім балалардың асырап алушы ата - аналары) 882 айлық есептік көрсеткіш мөлшерінде қосымша шегерім қолдануға құқылы, бұл 2,3 миллион теңгені құрайды (Салық кодексінің 345, 346, 353-баптары)», - деп хабарлады ҚР Қаржы министрлігінің Мемлекеттік кірістер комитеті.
Естеріңізге сала кетейік, қазақстандықтарға 2021 жылдың 1 қаңтарынан бастап тұрғын үй жағдайын жақсарту, емдеу және қаржы компанияларын басқаруға беру үшін зейнетақы жинақтарының бір бөлігін алуға рұқсат берілді. Бұл туралы Президент Қасым-Жомарт Тоқаев Жолдауында айтты.
