«Күндіз-түні WhatsApp-тан көз алмайды». Тоқаев қашықтан оқудың кері әсеріне тоқталды
Президент санитарлық талаптарды сақтай отырып, дәстүрлі оқуға барынша тез оралу керек деді
Бүгін Қазақстан халқына жолдау жасаған Президент Қасым-Жомарт Тоқаев еліміздің білім саласы қашықтан оқуға дайын болмағанын мойындау керек деді. Президент қашықтан білім беру – мұғалімдер мен оқушыларды WhatsApp желісіне телміртіп қойды деген пікірде.
Тоқаев атап өткендей, қазір Қазақстанда онлайн білім беретін бірде-бір отандық платформа жоқ. Сондай-ақ, қашықтан оқыту жұмыстың тәсілі мен мазмұнына кері әсер етеді.
«Үкіметтің қателігін білеміз. Ашығын айтқанда, онлайн білім беретін бірде-бір платформа жоқ. Ұстаздар мен оқушылар күндіз-түні WhatsApp-тан бас үзбейтін болды. Бірыңғай онлайн платформаны шұғыл әзірлеу керек. Сапалы білім алу үшін әдеттегідей сабаққа барып, ұстаздарымен аралысуы керек. Сондықтан cанитарлық талаптарды сақтай отырып, бұрынғы дәстүрлі білімге оралуды тездету керек», - деді Тоқаев.
