Түркістан облысында жол жиегінен табылған екі жасар бала анасына табысталды

Сарыағаш ауданда жергілікті полиция қызметінің учаскелік полиция инпекторы, полиция лейтенанты Палходжаев Берік жол бойында жалғыз өзі жүрген 2 жас шамасындағы қыз баланы тауып алды, деп хабарлайды Облыстық ПД баспасөз қызметі.

«Полицей бүлдіршіннің ата-анасын анықтау мақсатында шұғыл іздестіру жұмыстарын жүргізген. Нәтижесінде балақайдың анасын тауып, аман-есен қолына тапсырды. 2 жастағы баланың ата-анасы Түркістан облысы полиция департаментіне шексіз алғысын білдірді», - деп жазылған ақпаратта. 

Тексеру барысында анықталғандай, анасы үй шаруаларымен айналысып жүрген кезінде қараусыз қалған бүлдіршін ауладан белгісіз бағытқа қарай шығып кеткен. Сонымен қатар, қыздың ата-анасына балаларды қараусыз қалдыруға болмайтындығы айтылып, түсіндіру жұмыстары жүргізілді.