Алексей Навальный жансақтау бөліміне түсті: оны улаған болуы мүмкін

Ресейлік оппозиционер Алексей Навальный мінген ұшақ Томск қаласынан Мәскеуге қарай бет алған. Алайда, оның денсаулығының күрт нашарлауына байланысты ұшақ Омск қаласына шұғыл қонды, деп хабарлады Жемқорлықпен күрес қорының баспасөз хатшысы Кира Ярмыш.

«Бүгін таңертең Навальный Томск қаласынан Мәскеуге қайтып келе жатқан. Жолда оның жағдайы нашарлады. Ұшақ шұғыл Омск қаласына қонды. Алексей уланған. Қазір біз оны ауруханаға алып барамыз», - деп жазды Ярмыш өзінің Twitter-парақшасында.

Оның айтуынша, осыдан бір жыл бұрын да Навальный уланған екен. Ол кезде оппозиционер полицияның уақытша ұстау абақтысынан ауруханаға жеткізілген.

«Біздің болжам бойынша, Алекесейдің шайына у қосқан. Өйткені, ол таңертеңнен бері шайдан өзге нәр татқан жоқ. Дәрігерлердің айтуынша, токсин ыстық сусын арқылы ағзаға тез сіңеді», - деп жазды Ярмыш.

Оның айтуынша, қазіргі таңда Навальный ес-түссіз жатыр.

«Ол қазір жансақтау бөлімінде жатыр», - деді ол артынша.

Әлеуметтік желілерде Алексей Навальныйды жедел жәрдем көлігі алып кетіп жатқан сәттің видеосы тарады. Ал Омск қаласындағы аурухананың өкілдері оның жағдайы тұрақты ауыр екенін айтты.