6 заң, 27 сауал, екі жаңа топ: Құрылтайдың қазан айындағы жұмысы жарияланды

Қазан айында Құрылтай депутаттары заң шығару жұмысын жалғастырып, әлеуметтік қолдау, бизнес пен агроөнеркәсіп кешенін дамыту, өңірлердің мәселелері және мемлекеттік инвестициялардың жұмсалуына қатысты бірқатар бастама көтерді, деп хабарлайды Azattyq Rýhy Құрылтайдың баспасөз қызметіне сілтеме жасай отырып.

Бір айда 6 заң қабылданып, 2 заңға Мемлекет басшысы қол қойды. Қазір 41 заң жобасы қаралып жатыр. Сонымен қатар депутаттар азаматтарды қабылдап, өңірлерде кездесулер өткізіп, халықаралық парламенттік алаңдарда Қазақстанның атынан өкілдік етті.

Құрылтай 6 заң қабылдап, 41 заң жобасын қарауда

Қазан айында Құрылтайда 6 заң қабылданып, оның екеуіне Президент қол қойды. Қазіргі уақытта 41 заң жобасы қаралу үстінде.

Сондай-ақ 2027–2029 жылдарға арналған республикалық бюджет бірінші оқылымда қаралды. Талқылау барысында депутаттар әлеуметтік міндеттемелерді орындау, бизнес пен агроөнеркәсіп кешенін қолдау, өңірлерді дамыту, мемлекеттік инвестициялар мен Ұлттық қор қаражатының жұмсалуын бақылау жөнінде ұсыныстар енгізді.

Президент тапсырмалары бойынша қандай жұмыстар атқарылып жатыр?

Мемлекет басшысының тапсырмаларын орындау аясында жаңа Азаматтық кодекстің жобасын әзірлеу жұмысы басталды.

Бұдан бөлек, жұмыс топтарында мүгедектігі бар балаларды қолдау, энергияны үнемдеу және баламалы энергетиканы дамыту, онлайн-платформалар мен масс-медианы реттеу, көші-қон саясаты, соның ішінде «алтын виза» мәселелері қаралып жатыр.

Кітапхана және кітап басып шығару ісі туралы заң жобасы Үкіметке жолданды. Сонымен қатар медицина қызметкерлерінің мәртебесін көтеру, учаскелік дәрігерлердің жалақысын арттыру, мұғалімдерді қызметтік міндетіне кірмейтін жұмыстар мен қысымнан қорғау жөніндегі бастамалар бойынша жұмыс жалғасуда.

Ал 2026 жылғы желтоқсанда «Экономиканың нақты секторын цифрлық трансформациялау» тақырыбында тыңдаулар өткізу жоспарланған.

Депутаттар мен комитеттер 100-ден астам отырыс өткізді

Қазан айында Құрылтайдың 5 отырысы, комитеттердің 38 отырысы, жұмыс топтарының 68 отырысы өтті. Комитет отырыстарының 10-ы кеңейтілген, екеуі тақырыптық форматта ұйымдастырылды. Сонымен қатар 2 дөңгелек үстел мен комитеттің 1 көшпелі отырысы өткізілді.

Дөңгелек үстелдерде Қазақстанның мемлекеттік шекарасын жайластыру және балық өсіру шаруашылықтарын жаңғырту мәселелері талқыланды. Ал Шығыс Қазақстан облысында өткен көшпелі отырыста отандық тамақ өнеркәсібі өндірушілерін қолдау мәселесі қаралды.

Мәслихаттармен жұмыс істеу және балалар құқығын қорғау бағытында жаңа құрылымдар құрылды

Қазан айында Құрылтай жанынан екі жаңа құрылым жұмысын бастады.

Біріншісі – Мәслихаттармен өзара іс-қимыл жөніндегі кеңес. Ол заңдарды әзірлеуге өңірлердің қатысуын қамтамасыз ету және олардың заңдардың қолданылуына қатысты пікірлерін ескеру мақсатында құрылды.

Екіншісі – «Қазақстан балалары» депутаттық тобы. Оның негізгі міндеті – балалардың құқықтары мен әл-ауқатына қатысты мәселелермен айналысу және өскелең ұрпақтың мүддесіне сай тиімді шешімдерді ілгерілету.

Қабылдауға 271 азамат келді

Құрылтайдың қоғамдық қабылдауында депутаттар бір айда 20 жеке қабылдау өткізді. Оған 271 азамат қатысқан.

Нәтижесінде 243 өтініш бойынша түсіндіру жұмыстары жүргізіліп, 28 өтінішке қатысты уәкілетті мемлекеттік органдарға хат жолданды.

Азаматтардың өтініштері негізінен сот ісін жүргізу, заңнаманы жетілдіру, әлеуметтік қолдау және тұрғын үй мәселелеріне қатысты болды.

Депутаттардың көмегімен азаматтарды жұмыспен қамту, әлеуметтік көмек көрсету, сондай-ақ сот және құқық қорғау органдарында қабылдау ұйымдастыру мәселелері шешілді.

27 депутаттық сауалда қандай мәселелер көтерілді?

Құрылтай отырыстарында депутаттар 27 сауал жолдады. Онда білім беру, ғылым, денсаулық сақтау, дербес деректерді қорғау, тұрғын орта сапасы, көлік және басқа да салалардағы өзекті мәселелер қамтылды.

Сонымен қатар Конституциялық «Заң мен тәртіп» қағидатын нақты іске асыруға ерекше назар аударылды.

Атап айтқанда, Д. Ділдебек жастардың есірткі қылмыстары мен дропперлікке тартылуының алдын алу шараларын күшейтуді ұсынды.

Ал А. Аймағанова тұрмыстық зорлық-зомбылық қаупін ерте анықтауға арналған «Электрондық қорғаныс аймағы» пилоттық жобасын енгізу бастамасын көтерді.

Құрылтайдың ақпараттық және халықаралық жұмысы

Қазан айында заң шығару жұмысының өзекті мәселелеріне арналған 3 брифинг өтті. Құрылтайдың әлеуметтік желілерінде депутаттар мен комитеттердің қызметі туралы 140-қа жуық жарияланым жарық көрді.

Депутаттар Президент Жолдауының негізгі бағыттарын түсіндіру мақсатында бұқаралық ақпарат құралдарымен де белсенді жұмыс жүргізіп жатыр.

Халықаралық бағытта Құрылтай делегациясы Бішкекте өткен ТүркПА-ның XV пленарлық отырысына қатысты. Жиында жасанды интеллект дәуіріндегі парламенттік ынтымақтастық мәселелері талқыланып, Бішкек декларациясы қабылданды.

Сондай-ақ Душанбе қаласында өткен Орталық Азия мемлекеттерінің IV Парламентаралық форумында өңірдегі бейбітшілік, қауіпсіздік және өркендеу мәселелері қаралды. Форум қорытындысында Душанбе декларациясы қабылданды.

Бұдан бөлек, депутаттар Парламентаралық одақтың 153-ші Ассамблеясына, ТМД Парламентаралық Ассамблеясы мен ҰҚШҰ Парламенттік Ассамблеясының іс-шараларына қатысты. Еуропалық одақ, Еуропарламент, ЕҚЫҰ Парламенттік Ассамблеясы және БҰҰ өкілдерімен, сондай-ақ Қазақстандағы шет мемлекеттердің дипломатиялық миссияларының басшыларымен кездесулер өткізді.

Қазақстандық депутаттар халықаралық комиссияларды басқаруға сайланды

Құрылтай депутаттары халықаралық парламенттік комиссиялардың басшылық құрамына да енді.

Құрылтайдағы "Әділет" партиясының депутаты С. Егізбаев ТМД Парламентаралық Ассамблеясының аграрлық саясат, табиғи ресурстар және экология жөніндегі тұрақты комиссиясының төрағасы болып сайланды.

Ал Құрылтайдағы "Әділет" партиясының депутаты М. Қожаев ҰҚШҰ Парламенттік Ассамблеясының саяси мәселелер және халықаралық ынтымақтастық жөніндегі тұрақты комиссиясының төрағасы қызметіне сайланды.