Заңсыз айналымнан тәркіленген: БҚО-да 100 мыңнан астам қорап темекі жойылды
Өнімнің жалпы құны шамамен 100 млн теңгені құраған
БҚО-да заңсыз айналымнан тәркіленген 100 мыңнан астам қорап темекі жойылды, деп хабарлайды Azattyq Rýhy агенттігі «Мой город» басылымына сілтеме жасап.
Батыс Қазақстан облысы бойынша Экономикалық тергеп-тексеру департаменті Орал қаласының тұрғынына қатысты тергеуді аяқтады. Ол акциздік маркасы және міндетті цифрлық таңбасы жоқ темекі өнімдерін заңсыз жеткізу және сатумен айналысқан.
Тергеу барысында ер адамның Қазақстанның басқа өңірлерінен акциздік маркасы мен міндетті цифрлық таңбасы жоқ темекілерді Батыс Қазақстан облысына жеткізгені анықталды. Заңсыз өнім Орал қаласы мен Бәйтерек ауданындағы тұрғын үйлерде сақталған. Бұл үшін оның туыстары мен таныстарына тиесілі үй-жайлар пайдаланылған.
Заңсыз айналымнан барлығы 102 мыңнан астам қорап темекі тәркіленді. Өнімнің жалпы құны шамамен 100 млн теңгені құраған. Соның салдарынан бюджетке 37 млн теңге акциздік төлем түспеген.
Орал тұрғынының әрекеті ҚР Қылмыстық кодексінің 214-бабы («Заңсыз кәсіпкерлік») бойынша сараланды. Сот ер адамды кінәлі деп таныған. Алайда оған қатысты іс ҚР жаңа Конституциясының қабылдануына байланысты жарияланған рақымшылыққа ілігуіне байланысты тоқтатылған.
Тәркіленген барлық темекі өнімдері жойылуға жатады.
БҚО бойынша Экономикалық тергеп-тексеру департаментінің мәліметінше, мұндай заңсыз схемалардың жолын кесу адал кәсіпкерлікті қорғауға және бюджет кірісін толықтыруға мүмкіндік береді.
