Елімізде пойыздардағы өрт қауіпсіздігін тексеру күшейтілмек
Жауаптылар Пәкістанның Пенджаб провинциясында болған қайғылы оқиғадан соң темір жолдағы тәртіпті тексере бастады
Қазақстанда жолаушы пойыздарында өрт қауіпсіздігін сақтау бойынша тексерулер күшейтіледі, деп хабарлайды Azattyq Rýhy тілшісі ҚР ИИДМ баспасөз қызметіне сілтеме жасап.
«Пәкістанның солтүстік-шығысында Пенджаб провинциясында болған қайғылы оқиғаны ескере отырып, ҚР ИИДМ Көлік комитеті Көліктік бақылау инспекцияларына ҚР Ішкі істер министрлігі Төтенше жағдайлар комитетінің құрылымдық бөлімшелерімен және «Қазақстан темір жолы «ҰК» АҚ-мен бірлесіп, республика аумағы бойынша жүретін барлық жолаушылар пойыздарында өрт қауіпсіздігі талаптарының бұзылуына жол бермеу мақсатында тексеру жұмыстарын жүргізуді әрі күшейтуді тапсырды», - делінген хабарламада.
Жыл басынан бері аумақтық көлікті бақылау органдары жол бойында 866 жолаушы пойызын тексерген. Нәтижесінде 5 136 жолаушы тасымалдау ережесін бұзғаны анықталды, оның ішінде 38-і өрт қауіпсіздігі бойынша кемшілік.
«Жолаушылар тасымалы» АҚ- 27; «Қала маңы тасымалы» АҚ- 4; «Қала маңындағы жергілікті атқарушы орган» - 1; «Жеке тасымалдаушылар» - 6 (Марал Нур-3 ЖШС, Nomadas-3 ЖШС) кемшілік анықталған.
Еске салайық, 31 қазан күні Пәкістанда Карачиден Равалпиндиге бара жатқан жүрдек пойыз өртеніп, 73 адам қаза тапты.
