ЖСДП ерекше қажеттілігі бар балаларды қолдауға арналған форум өткізді
Іс-шара елордада ұйымдастырылды
ЖСДП Астанада ерекше қажеттілігі бар балалар мен олардың отбасыларын қолдау мәселелеріне арналған Kazakhstan Inclusive Forum 2026 форумын өткізді. Жиынға ерекше қажеттілігі бар балаларды тәрбиелеп отырған отбасылар, сарапшылар, қоғамдық ұйымдардың өкілдері және Құрылтай депутаттығына кандидаттар қатысты, деп хабарлайды Azattyq Rýhy.
Кездесуде инклюзивті ортаны дамыту, ерекше қажеттілігі бар азаматтардың құқықтарын қорғау, білім беру, медициналық және әлеуметтік қызметтердің қолжетімділігін арттыру мәселелері сөз болды.
Іс-шара ашық аспан астында өтіп, бағдарламаға панельдік пікірталастар, сараптамалық кездесулер және балалар мен ересектерге арналған интерактивті алаңдар кірді. Қатысушылар арнайы кеңес беру орындарында құқықтық және әлеуметтік мәселелер бойынша мамандардан кеңес алды.
Форум барысында аутистік спектрі бұзылған балаларды ерте анықтау, оңалту және әлеуметтік бейімдеу мәселелеріне де назар аударылды. Сарапшылар ерекше балаларды тәрбиелеп отырған отбасыларға көрсетілетін қолдауды жүйелеу қажеттігін айтты. Сонымен қатар мүгедектігі бар азаматтарды жұмыспен қамту, арнайы жұмыс орындарын құру және қалалық ортаның қолжетімділігін арттыру мәселелері қаралды.
Форум қорытындысы бойынша ЖСДП сарапшылар тобымен инклюзия саласына қатысты ұсыныстар әзірленді.
