Алакөлде туристік маусым ашылды

Абай облысында Алакөл көлінің жағалауында туристік маусымның ресми ашылуына арналған «Алакөл алаулары – 2026» фестивалі өтті. Өңір әкімдігінің баспасөз қызметі хабарлағандай, биыл демалушылардың жайлылығы мен қауіпсіздігі үшін бірнеше маңызды жоба іске асырылған, деп хабарлайды Azattyq Rýhy.

Маусымның ашылу салтанатына Абай облысының әкімі Берік Уәли қатысып, тұрғындар мен қонақтарды құттықтады. Ол Алакөлдің көне заманнан бері ғалымдар мен саяхатшылардың еңбектерінде аталып өткенін және бүгінде отандық әрі шетелдік туристер үшін ең танымал демалыс орындарының бірі болып қала беретінін атап өтті.

Әкімнің мәлімдеуінше, жағалаудағы мәдени іс-шаралар маусым бойы үзілмейді.  Концерттік бағдарламалар тамыз айына дейін аптасына екі рет (сәрсенбі және сенбі күндері) өткізіліп тұрады. Шараларға облыстың аудандары мен қалаларынан келген өнерпаздар, сондай-ақ «Абай елі – өнер кеніші» байқауының қатысушылары қатысады.

Фестиваль аясында халық және эстрада орындаушылары, соның ішінде белгілі күйші-композитор Секен Тұрысбек өнер көрсетті. Мерекелік шара отшашумен аяқталды.

Биылғы маусымға дайындық барысында көл жағасындағы жайлылық деңгейін арттыру үшін ауқымды жұмыстар атқарылған. 

 Жағалауда демалушыларға қолайлы жағдай жасау мақсатында 50-ден астам санитарлық нысан, 35 душ кабинасы, 110 киім ауыстыратын орын және қоқысқа арналған 250 контейнер орнатылды. Соңғы екі жылда 10 шақырым жолға асфальт төселіп, туристердің қауіпсіздігін қамтамасыз ету үшін жағалау бойына 5 мың метр қоршау қойылып, 224 бейнебақылау камерасы іске қосылды. Сонымен қатар, электр қуатының тапшылығы мәселесін шешу мақсатында ұзындығы 72 шақырым болатын «Көктал – Алакөл» электр беру желісінің құрылысы басталды.